ገጣሚ ና መምህር ወርቅነህ ፍቅሩ

መምህርና ገጣሚ ወርቅነህ ፍቅሩ ተወልዶ ያደገው በአዲስ አበባ መርካቶ ፲፰ (18) ማዞሪያ አካባቢ ነው። መሠረታዊ ትምህርቱን በጣሊያን ካቶሊክ ካልቸራል እና በሰዋሰው ጳውሎስ ትምህርት ቤቶች የተከታተለ ሲሆን፣ የሁለተኛ ደረጃ ትምህርቱንም በኮምፕሬንሲቭ አጠናቋል። ምንም እንኳን ለትምህርት ወደ ባሕር ዳር ዩኒቨርሲቲ አምርቶ የነበረ ቢሆንም፣ በምርጫው ባልሆነ የትምህርት ዘርፍ በመመደቡ ምክንያት ትምህርቱን አቋርጦ ወደ አዲስ አበባ ተመልሷል። በኋላም በኮተቤ ሜትሮፖሊታን ዩኒቨርሲቲ በሥነ-ጽሑፍና ጋዜጠኝነት የመጀመሪያ ዲግሪውን በማግኘት፣ ለኪነ-ጥበብና ለቋንቋ ያለውን ጥልቅ ፍቅር በሙያዊ ዕውቀት አዳብሯል።

በሥራው ዓለም መምህር ወርቅነህ ፍቅሩ ሥራውን አክብሮ የሚሠራ፣ ከሥራ ባልደረቦቹም ሆነ ከተማሪዎቹ ጋር እጅግ መልካም ግንኙነት ያለው ተግባቢና ትሑት መምህር ነው። መምህርነቱን ከሥነ-ጽሑፍ ጋር አቆራኝቶ የሚጓዝ ሲሆን፣ በተለይም በኤፍ.ኤም 97.1 በአራዳ ፕሮግራም ላይ በሥነ-ጽሑፍ አዘጋጅነት የሠራባቸው ጊዜያት ለማኅበራዊ ሕይወትና ለጥበብ ያለውን ቅርበት ያሳያሉ።

ከመምህርነቱ በተጨማሪ ወርቅነህ ፍቅሩ ጥልቅ እይታዎችን በግጥም የመግለጽ ልዩ ተሰጥኦ ያለው ገጣሚ ነው። ነገሮችን በዝምታ የመታዘብና ከዕድሜው በላይ በሆኑ ረቂቅ ሐሳቦች የመቀመር ችሎታው ብዙዎችን የሚያስደንቅ ሲሆን፣ "የተዛቡ ገፆች" የተሰኘውን የግጥም መድብሉንም አጠናቆ በቅርቡ ለአንባብያን ለማቅረብ በዝግጅት ላይ ይገኛል። ምንም እንኳን በተግባቢነቱና ከሰዎች ጋር ባለው ቀረቤታ በርካታ ቅጽል ስሞች ቢሰጡትም፣ በሥነ-ጽሑፍ ዓለም ውስጥ "ራስ ካህሳይ ዘወልዴ" በሚለው የብዕር ስሙ በስፋት ይታወቃል።